فجر تركي آل الشيخ، رئيس هيئة الرياضة السعودية، والرئيس الشرفي الأسبق للنادي الأهلي في تصريحات تليفزيونية لبرنامج مع شوبير في فضائية صدى البلد العديد من المفاجآت ،أبرزها تراجعه عن مقاضاة مسئولي النادي الأهلي مثلما أعلن محاميه الدكتور محمد حمودة في تصريحات مصورة ، بالإضافة إلى تأكيده على أنه مستعد لدعم النادي الأهلي مستقبلاً والوفاء بكل الوعود التي قطعها على نفسه وتحديداً بناء استاد الأهلي.

التصريحات التلفزيونية لتركي جاءت بعد فترة جفاء استمرت بين رئيس هيئة الرياضة السعودية ومجلس إدارة الأهلي ، التي أعقبت البيان الذي نشره تركي آل شيخ وكشف خلاله معلومات كارثية عن تمويله للنادي الأهلي بـ 260 مليون جنيه ودعمه محمود الخطيب قبل انتخابات النادي الأخيرة بستة ملايين جنيه.

في السطور التالية ننشر نص المكالمة التي دارت بين أحمد شوبير تركي آل شيخ والتي جاءت كالتالي:

شوبير: حضرتك طلبت أنك تعمل مداخلة وحابب أسمعك وأعرض الأسئلة عليك.. أتفضل

تركي آل شيخ : تلقيت في الأيام الأخيرة عدة اتصالات من أشخاص بيحبوا يصطادوا في المياه العكرة ، وعاوزين يستغلوا الأزمة بيني وبين مجلس الأهلي ، ويستغلوا ده ضد الاهلي اللي اصلا انا عاشق له وبحبه.

لما لاقيت الموضوع وصل للشكل ده فأنا قررت أني اتنازل عن كل الأمور اللي تخص إدارة الاهلي والخطيب وإحنا أخوان وحبايب ، وسنظل حبايب ولن أسمح بأي ضرر يمس الأهلي وطول مانا رئيس الاتحاد العربي.

عاوزين يضروا الاهلي ويوقفوا فلوس الأهلي ويضروا بناس في الادارة انا مش هسمح بده، حصل منهم أغلاط، مش مُنتظر أي اعتذار منهم ، وكأن مافيش حاجة حصلت، جمهور الأهلي لازم يعرف اني عملت ده عشانهم وعشان بحب الاهلي وانا مسامحهم.

شوبير: نعود للبناء من جديد وفي عتاب وبسبب ان مرتضى أعلن المدرب برعاية حضرتك وأن في لاعب برضو تحت رعايتك.. عاوزين صفقات للأهلي وأنت أكبر من كلمة رئيس شرفي!

ترك: أنا بابي مفتوح وتليفوني مفتوح لأي حد في مصر أنا رئيس الاتحاد العربي من الخليج إلى المحيط، في ناس بتقول بلده أولى انا شغال جوه بلدى وبره بلدي ، وبتكلم كوني رئيس الاتحاد العربي وواجبي اخدم الأهلي والزمالك وفي المغرب والسودان والسعودية والإمارات، كل الأندية على رأسي، أنا مبسوط ، وعلشان كده انا بأكد أنه عفا الله عما سلف ونسيت الماضي.

الرياضة المصرية مقبلة على خير ويؤكد ده قانون الرياضة وأتمنى من الوزير الجديد يمشي على نفس نهج خالد عبد العزيز اللي انا افتقده في الحقيقة.

يمكن جمهور مصر يكون زعلان مني بسبب كأس العالم، عايز منهم يفتكروا اني وزير سعودي ومن مصلحتي اني انكد على صلاح شوية وكان ع سبيل الدعابة و غلبناكم، وأتمنى يكون منتخبكم فيه 100 صلاح.

شوبير: زي ما حضرتك دعمت الزمالك وبيراميدز.. عاوزك تقول أن حضرتك هتدعم الأهلي ومدينته الرياضية؟

ترك: هو إحنا أطفال؟ مافيش حاجة انه لما يكون بينا خلاف يكون كله “بح” ، ده كلام رجاله وقعدت مع فخامة الرئيس السيسي وعرضت عليه المشاريع اللي عاوزين نعملها، هل من الطبيعي أتراجع عشان خلاف بسيط، لكن يجب ان يكون في أسس واضحة لكي لا تتكرر المشاكل.

شوبير: مشروع مدينة الأهلي الرياضية قائم ؟

تركي: مدينة الأهلي جنب بيراميدز إن شاء الله

شوبير: وبيراميدز إن شاء الله بس الأهلي هو الأساس وبيراميدز 3 أيام ومروح لكن الأهلي قديم منذ الأزل وحضرتيك جيت الأهلي عشان عارف شعبيته!

تركي: ما اللي بيشتغلوا في بيراميدز كلهم أهلاوية

شوبير: بس الأهلي هو الأساس بيراميدز ده فرع والأندية دي فروع والأهلي ده الأساس!

تركي: هو النيل أه .

شوبير: خلينا أقولك بقى محتاجين صفقات؟

تركي: حد خبط الباب وقولنا لأ يا أحمد !

شوبير: احنا عاوزين صفقات وطلبي كإبن من أبناء الأهلي !

تركي: أنا بقولك حاضر

شوبير: ليا رجاء أن حضرتك “متتنرفزيش” من الهجوم عليك في السوشيال ميديا !

تركي: فاهمين اللي بيدير اللجان دي والشغل على مصر والسعودية ولجان الإخوان المسلمين وبلاش نقول اكتر من كده.

شوبير: عاوزين ازارو يقعد؟

تركي: المفروض يجلس.. لو طُلب مني ذلك مش هقصر

المهم اللي عاوز أقوله أنا رئيس الاتحاد العربي ، وده واجبي وفي مشاريع في تونس والمغرب والبحرين والاردن والسودان، مصر ستكون البداية.

شوبير: حجر الأساس للمدينة الرياضية للأهلي امتى؟

تركي: لما يخصصوا الأرض شد حيلك بس انت معانا شكرا شكرا يا أحمد.